Ni ride paling lamo eden prepare. Sobulan sobolun tu eden dah gi repair si Blade eden tuh. Tukar tayar, tukar minyak itam, tuning, idup an road tax. Lopeh tu siap testing lagi… poie balik kojo. Bukan apo, Blade eden tu dah masuk aktegori veteran…. Jadi ghisau sket nak jalan jauh…….
Camano bulih topilih tarikh ni, eden pun tak paham. Tarikh ni samo dongan tarikh gi ride Pangkor. Tapi eden tak do hal…. Hantam…………….
24/12/2011
Eden bangun dogheh gak, tapi banyak bona bondo yang nak diusik. Ghantai Balde eden dibasuh eh dek Amir sampai kilat. Gilo weiii… maun monyanyi ghantai ni kang, bilo air dah koghing. Eden boh lah minyak…. Tak tahulah boghapo jauh minyak tu boleh molokek.
Lopeh tu, tank bag yang eden boli tu pulak, tolmapau ponuh. Dah jadi cam wind screen plak kek ateh tank tu…… Kono re-pack baghulah ghondah sket deh. Tali pongikek eh plak dah ghoput…
07:20hr baghu nak start mutu. Sori lah kengkawan yo eden dan gepren lambek plak sket. Sampai kek R&R Seremban (North Bound) Roling, Bob dan Edzli dah tunggu. Tros……. zassssssss……. Eden ghaso maso tu dah kol lapan lobih dah!
Cuaco pagi tu… perghhh… cam kek Europe. Sojuk, kabuih…… Tompi dalam cuaco cam tu…. ride besh. Sampai kek Serdang…. gedebusahhhhhhh…. Ujan turun. Tompi tak lobek bona. Roling tak boghonti… yang lain pun ikut yo lah. Keto pun tak boghapo banyak soba ari Sabtu.
Dari Serdang, ke Jalan Sg Bosi ke Jalan Lapangan Terbang dan tros masuk Tol Jalan Duta. Tak lamo sampai R&R Sg Buloh. Sumo dah nunggu kecuali si Jan Xtrail. Sani pun ado. Eden ingat dio nak ikut kali, tompi ghupo eh nak flag-off yo. Eden tengok BB, ado plak sms dari member eden (SYM250) ngobaan dio tak dapek ikut.
Tak lamo lopeh tu Jan sokoluargo sampai. Cukup korum dan tros mara ko Esso. Kono isi dulu wooooo…. Anggota kali ni… Blade Takori, Atlantic, Blade 250, SYM200 (4 biji) dan 135 LC…..aaaaa…. lupo plak ado species ganjey satu ari ni… Nissan Xtrail…. dalam ghamai rider/driver tu… ada 2 lagi ganjey… sokali pandang, ghoman eh cam tikuih… tompi duo kali pandang cam tupai lah pulak….2 ekor Sugar Glider. Sojarah ni……tak ponah 4 legged creature ikut dalam ride….. ehmmmmm…. Muahahahaaaaaa…. Sib baik si Fulbber(kucin jantan anak eden) tak ikut kalau tak maun dio bokojaan dongan si Sugar Glider tu……………
Lopeh isi minyak, ride cam biaso, jalan menuju ko Tanjung Malim, memang banyak keto kalau pagi Sabtu. Cilok yo lah mano yang bulih. Walaupun banyak keto tapi tak jem la. Laju yo gemg S2 Rider moncilok.
Sampai toll Tanjung Malim, kuar sobab somasing nak ghaso jalan dalam plak. Maso ni sobona eh poghut pun dah bokoroncong. Dah macam gamelan dah bunyi eh. Tapi jalan ke Slim River tu memang nostalgialah sobab eden ponah duduk Slim River maso awal 90an dulu. Maso tu kojo buek heway.
Lopeh pokan Slim River bagi signal kighi….kodai Mamak beb. Gamelan dah kuek bona dah bunyi eh. Ponuh kodai tu. Cemacamlah yang kami oda….ghuti tolow, ghuti bawang, ghuti tolow tak do bawang. Tompi pirasat eden ngobaan, orda lah nasi lomak, nescayo copek sampai. Tompi ado yo yang tak orda, si Sugar Gliders. Dio ado bawak boka…..ceneke botow!
Firasat oghang tuo-tuo ni solalu botow. Memang nasi lomak sampai dulu. Eden balunlah. Yang lain pueh nunggu sobab Mamak tu kughang kaki tangan. Tompi dapek gak lah akhir eh.
Lopeh montodaghah, ride balik. Jalan dari Slim River ke Bidor ni memang besh. Lughuih dongan kona panjang. Keto pun tak banyak bona sobab oghang yang bojalan jauh ikut hewah. Enjoi lah … cuaca lak memang besh…. Cam tour ride kek Eropah….botow ko tak eden tak tahulah sobab eden pun tak ponah poie sanun….. muahahahaha….. kok tak botow mintak mahap lah yo. Sajo nak nyodap an coghito haaa…
Sampai yo Bidor… aduhaiiiilaaaaaa…. Hujan beb. Sumo eh boghonti. Eden pakai baju ujan. Tompi si Roling dan Bobe tak pakai. Roling tak pakai mungkin sobab dio waterproof, Bobe plak koba dio tak ado baju ujan sobab tak do saiz bilo nak boli. Tak po lah Bobe, sok kito jahit sendighi yo…… muahahahahaaaaa….
Tompi tak lamo doh ujan eh. Maso masuk balik ko heway kek Tapah, ujan dah ghodo dah. Power ride sampai Ipoh. Laju gak kek situ. Sumo eh bodosup. Maso nurun Bukit tempurung tu, perghhh…. moncanak sumo eh. Kek Ipoh pun keto tak boghapo banyak.
Kalau ikut an jadual, memang dah agak lambek. Nak tuju ko Tepen untuk makan tongahaghi kek umah DSP Faisal. Tompi kono isik minyak dulu. Kalau tak kang maun yo botolak si Laici tu. Jadi singgah kek R&R Sungai Perak. Maso tu eden dah toghimo sms dari DSP Faisal sughoh update lokasi.
Dari Sg Perak ko tol Changkat Jering memang tak jauh bona. Sampai yo kek toll, duo bijik kudo putih dah tunggu. Sampai yo si Xtrail, sumo eh tros masuk line.
Gilo beb… tak ponah eden ride ado eskot. Kali ni ghaso cam VVIP yo. Duo polis trafik eskot kitoghang. Jalan clearrrr….. traffic light meghah pun toghuih yo. Keto lain kotopi bogi laluan….Banggoooooo….. (Sani, ghugi botow ekau tak ikuttt!) Moncanak tongah-tongah pokan Tepen. Kok oghang sokali pandang memang tak heghan…..Padan muko mat rempit, koni eskot po’ie balai!.... tompi kok dio observe (muahahaha.. to speaking London plak).. mungkin heghan.. camano plak Mat Rempit ni ghelo yo ngikut. Solalu eh botompiaghan… laghi….. he..he..he….!
Sampai umah DSP Faisal….. lagi tolopong kitoghang. Ado kemah, cam nak kendughi. Masuk umah, perghhhhhh…..nasik beriani, kari ayam, kari daging, sambal bolacan. Cairrrrrrr……. Ghaso nak toghokam.. tompi maluuuu… dok jap borak-borak. Lopeh tuan ghumah ajak 7 kali, baghu sosah….. muahahahahaaaaaa……
Lopeh makan, ado plak yang gata sobut posa dughian. Dah pogawai bopangkat, sotakat dughian ni lolap mato yo lah. Tahu-tahu dah tolonggok dopan mato. Dongan ponuh sopan si Bob Panjang ngupik an sobijik…sobijik…sobijik….. Yang isik kuning oren tu… mangg aaiii… sodap. (Memang ghugi botow ekau tak ikut Sani!)
Lopeh hongeh baghu toghingat, tujuan sobona eh nak gi Tasik Banding. Bogogeh po’ie sembahyang dan prepare nak sambung ride ko destinasi. Lopeh salam-salam dan ucap terima kasih kepada DSP Faisal sekeluarga, kami zasssssss lagiiiii…….
Sobonar eh this was where the adventure really begun (muahaha.. apo posa pulak lidah eden ghaso lain macam yo nihhhh).
Maso kuar dari umah DSP, eden cam konfiden yo leh cari jalan ko Kuala Kangsar. Jalan punyo jalan, tak do satu papan tando pun kek topi jalan. Dah eden moghaban dalam town Tepen tu. Tak jumpo jalan kuar. Ekor pulak putuih. Bilo tengok bolakang, ado Fido, Edzly dan Saiful Laici yo. Yang lain ilang. Caghik jalan kuar dulu lopeh tu baghu kontek yang lain.
Lopeh pueh bolegar, baghu jumpo jalan ko Kuala Kangsar. Tu pun lopeh Edzli tanyo makcik jual goring pisang. Sampai lopeh simpang tol, boghonti kek topi jalan. Tengok ado sms ngobaan mutu Bob Panjang ghusak. Toghuih lepak kek bus stop dokek situ.
Tunggu lamo gak. Dioghang yang toman an Bob, sughoh kami jalan dulu tapi kono tunggu Jan yang nak ikut samo. Dalam pojalanan Jan pulak masuk salah simpang dan tosangkut dalam jem. Bilo mutu Bob dah siap repair dan sampai kek bus stop, Jan masih tak sampai laie.
Bilo Jan sampai, sumo nak goghak. Bobe dongan konfiden sughoh yang lain jalan. Bilo dionak jalan mutu eh plak tak leh start. Maso tu yang lain dah bodosupjauh. Tingga eden dan Fido yo. Muahahahahaha…..
Fido gi carik jumper tompi somontagho tu Bobe gi tanyo brader kek kodai phone soboghang jalan. Sib baik dio ado jumper….. gilo lamo tak pakai beb…. Siap bokaghat dan ponuh dongan pasir. Tompi masih okay dah dapek start Atlantic bilo jumper dongan Blade Takori eden. Lopeh dapek start mutu Bobe, Fido tipon, dio koba, kalau nak pijam jumper kono deposit RM50. Kensel pinjam jumper sobab mutu dah idup. Fido sampai yo… tros jalan. Lain lain dah tunggu kek Petronas sobolun pokan Kuala Kangsar.
Kek Petronas mutu Bobe mati lagi. Tapi kali jumper dioghang dah boli dan jumper plak dari bateri Xtrail. Beghehhhh…………….
Dari Kuala Kangsar, ride kek Gerik. Haghi dah golap tompi sumo laju yo. Lampu sumo toghang. Maso tu ado plak boboghapo mutu lain jang tumpang konvoi.
Sobolun pokan Gerik, isik minyak. Takut stesen minyak seterus eh tutup. Lopeh Gerik ambil simpang ke Kota Bahru. Kek sini jalan mendaki bukit. Selekoh memanjang. Cuaca….sojuk beb, dah macam panjek genting highland plak ghaso eh.
Sampai kek resot dah dokek 23:00hr. Legaaaaaaaa………….
Tompi poghut dah main lagu gamelan balik. Yo tak yo..kuar gaklah poie kek pengkalan. Kodai dah nak tutup. Sib baik dio maun layan, kalau tak maun yo minam air tasik buek aleh poghut….. muahahahaaaa……….. Nasik goring pataya + soup cendawan+ the tarik…… arrgghhhhhh….. nyaman supper ari ni!
Sodang makan tu, totibo ghiuh. Eden ingat kok ado potunjukan badut… ghupo eh ado babi utan datang jenjalan tak jauh dari tompek kitoghang makan tu. Sib baik jauh, kok dokek maun kono molih seko…. buek barbeque….. (botow ko eden ejo ni…).
Lopeh makan toghuih balik bilik. Ponek wei. Titon lah pulak. Capo yang beghajat nak datang sini, memang bulih bona. Bilik eh besh gak lah. Bersih dan baru. Seleso!
25/12/2011
Tojago kol 07:00hr. Toghingat sun rise. Bukak pintu balcony…..aduhaiiii…. cun. Lake view tu beb. Tompi tak do kosan matohaghi toghobit kek arah tu. Tapi lawa gak lah lake view dari bilik.
Lopeh tu lepak balik. Tosodar dah kol sepuloh… muahahaha….. Toghuih bokomeh untuk check out. Mulo cadang nak sarapan, liatttt. Minam kupi pree kek dalam bilik yo lah.
Yang lain dongar koba eh sompek poie pengkalan. Boli ikan baung untuk makan tongahari. Ado yo yang sompek mincing bagai. Dapek ikan ko tidak eden tak tahulah. Eden kalau mancing ni……kuuurrreeennnggggggg….. Dioghang yang bawak pancing….biarlah. Kalau tak dapek ngulor an mato kaie tu dalam tasik kang kok moghobeh lak air mato…..muahahahaaaaa…
Kol 12:00hr eden dah ampai kek loby. Tros soghah kunci. Sompek gi jenjalan ko tingkat 1 bangunan tu. Tengok ado kolam ghonang dan pemandangan cantik kek bolakang resort tu.
Sampai balik level “L”, makan tongahaghi dah sodio. Apo laie…. pulun. Ikan baung masak lomak. Ayam goring dan sambal bolacan. Eden tak toleh kighi kanan sobab pagi tadi tak sarapan.
Perghhhh… pueh hati. Kalau dapek kek eden ikan baung tu…..kasih sket asam limau dan lado api…..aduhaiiiiilaaaaa…. maun sopiuk nasik abih eden kojo an.
Sobolun bertolak balik, sompek kasik minyak sket rantai Blade eden sobab jalan jauh bona, dah jadi tolampau koghing. Sib baik Roling ado bawak minyak itam spare. Eden ghisau gak sobab bunyi rantai tu dah jadi tolampau kuek. Kok putuih… mampuihhh wei…….
Pukul boghapo mulo jalan balik eden tak ingat. Cuaca congah dan kengkadang paneh. Silau gak mato eden kengkadang tuh. Bilo turn yo dari resort tu, eden ko dopan sket. Sajo nak layan jalan tu. Besh gak cam jalan Simpang Pulai – Cameron Highland. Blade pun ikut yo rontak eden. Walau pun naik boduo, well behave gak Blade eden kek kona-kona tu.
Lopeh pueh hati layan…. Eden cruise balik sambil tunggu yang lain. Pejalanan balik ni agak laju. Kojap yo dah samapi Kuala Kangsar. Ado plak cadangan nak naik balik ko Tepen untuk makan mee udang. Aduiiiyaiiii…. Jangan lah wei….. jauh tuuuuuu.
Si Atlantic masih ado masalah. Bilo kek traffic light, enjin cam nak mati bilo idling. Si Bobe topaksolah pujuk dio. Kalau tak kang maun tak sampai umah dibuek eh.
Bilo masuk yo heway, semasing laju yo. Sampai kek R&R Sg Perak, somuo sopakat untuk berenti rehat. Poghut dah mulo lapar balik dah, mutu-mutu pun dah kosong tangki eh.
Eden pusing-pusing carik ABC untuk gepren eden bilo eden tonampak menu menarik Telur Separuh Masak Special. Eden pun oda 2 set. Perghhh… besh gak potang-potang makan telur separuh masak dengan roti bakar. Lopeh tu ghamai pulak yang minat….. dan oda. Patut eh eden dapek kamsin ni sobab tolong promote!
Lopeh minam, gepren eden sompek plak boli asam rojak buah Mak Bee. Lopeh tu eden tros isik minyak. Kalau kigho-kigho eden botow, minyak ni leh bawak sampai Ulu Bernam. Lopeh isik minyak zasssssss……………..
Tak lamo dari situ sampai terowong. Lopeh terowong jalan menurun tapai banyak keto. Keadaan jalan koghing jadi konfiden sket nurun bukit tu sampai Ipoh.
Dari Ipoh, crusing laju botow. Bolun sompek bonapeh dah sampai Tapah. Ikut firasat eden, patut eh berenti kek sini sobab Laici mesti dah nak koghing. Tapi, eden tengok Roling toghuih yo. Eden pun ikutla. Sampai kek layby mano ntah…. Berhenti sbb tunggu yang lain. Tak lamo lopeh tu yang lain sampai. Sib baik si Laici berenti sendiri isik minyak, kalau tak maun botolak untuk sampai ko Ulu Bernam.
Sebaik yo mulo jalan balik, eden tonampak Ferari Meghah. Laju, cilok kiri, cilok kanan. Eden pun cubolah follow dongan Fido. Lamo gak eden ngekor an Ferari ni. Kalau kito bawak mutu, oghang solau kutuk, laju lah, bahayo lah, moncolah tak hengat oghang lah. Ari ni eden perati ghagam pemandu Ferari yang lobih dahsyat. Dio bawak laju, cilok colah keto, ikut keto dopan tak sampai 2 kaki jaghak eh, masuk emergency lane untuk potong keto lain. Eden ghaso, jauh lobih dahsyat dari Mat Rempit tegar kek nogagho kito nih……Jumpo yo jalan clear, zassss…. Toghuih ilang dari pandangan….. muahahahaaaaa…..
Sampai R&R Ulu Bernam, eden tros masuk. Gilo awal sampai sini. Solalu eh sampai sini keadaan dah longang, kali ni tongah oghang ghamai…. hee….. Bilo Tuan Bendahari datang, eden oda mihon kari dan the tarik.
Sobolun botolak balik, salam-salam dongan Saiful Laici. Dio akan kuar awal untuk balik umah kek Shah Alam (kalau tak silap eden laaaa). Yang lain akan tros ke tol Jalan Duta. Dalam pojalan totibo nampak ado yang berenti kek Sg Buloh. Bilo boghonti dio koba mutu eh molotup-lotup cam bunyi moghiam. Muahahahaha…. Eden koba, tak do hal punyo, valve atau kaburator dah mulo tak cun yo!
Sampai Tol Jalan Duta, tingga 7 bijik yo sobab si Saiful dah exit awal. Edzel dan Fido akan kuar ke KL, yang lain akan tros ke Seremban. Eden, Roling dan Bobe akan singgah kek R&R Seremban untuk tukar barang. Edzli dan Bob Panjang akan tros ke Seremban sobab gepren semasing dah ponek bona.
Lopeh basah an tokak, betolak dari Tol Jalan Duta. Lalu Jalan Istana menuju ke Jalan Sg Besi dan tros ke Seremban. Sampai R&R, eden berenti kojap untuk ambil barang dari Bobe. Eden mintak diri dulu, tros menuju SonangWang.
Sampai umah sekitar 00:00hr. Legaaaa….. total mileage kek Blade eden ialah 934km. Tompi kono campur lobih kughang 15km sobab eden lupo set maso mulo an pojalanan. Jadi jumlah perjalan yang dicatit dek si Blade ialah lobih kughang 950km.
